మంచు మనోజ్ ఇండస్ట్రీలో చాలా కాలం గ్యాప్ తర్వాత మళ్ళీ భైరవం సినిమాతో మన ముందుకు వస్తున్నారు. ఆ సినిమా ప్రమోషన్స్ లో భాగంగా ఈ మధ్య ఇచ్చిన ఇంటర్వ్యూల్లో మనసు విప్పి చాలా విషయాలు పంచుకున్నారు. అందులో కొన్ని మనల్ని ఆశ్చర్యపరిచే విషయాలు కూడా ఉన్నాయి.
మనోజ్ మాట్లాడుతూ… తన కెరీర్ లో కొన్ని సినిమాల్ని మిస్ చేసుకోవాల్సి వచ్చిందని చెప్పారు. అందులో ముఖ్యంగా ఆయన ప్రస్తావించినవి మూడు సినిమాలు రచ్చ, ఆటో నగర్ సూర్య, ఇంకా అర్జున్ రెడ్డి.
రచ్చ, ఆటో నగర్ సూర్య సినిమాల విషయానికొస్తే… వీటిని తను కావాలని రిజెక్ట్ చేయలేదట. కేవలం డేట్స్ అడ్జస్ట్ కాకపోవడం వల్లే వాటిని మిస్ చేసుకోవాల్సి వచ్చిందని క్లారిటీ ఇచ్చారు. రచ్చ సినిమా తన ఫ్రెండ్ చరణ్ దగ్గరికి వెళ్లి పెద్ద హిట్టయ్యిందని, అది చూసి తాను చాలా హ్యాపీ అయ్యానని చెప్పారు. ఆటో నగర్ సూర్య కూడా మరో హీరో చైతు దగ్గరికి వెళ్లిందని అన్నారు.
ఇక అర్జున్ రెడ్డి సినిమా గురించి మనోజ్ కొంచెం ఎమోషనల్ గా మాట్లాడారు. ఆ సినిమా స్టార్టింగ్ లో తన దగ్గరికే వచ్చిందని, ఆ టైంలో తనకున్న కొన్ని పరిస్థితుల వల్ల (అన్ఫార్చునేట్ గా) ఆ సినిమాను మిస్ చేసుకున్నానని చెప్పారు.
మరి ఆ సినిమాల్ని మిస్ చేసుకున్నప్పుడు ఎలా ఫీల్ అయ్యారు ? ముఖ్యంగా అర్జున్ రెడ్డి లాంటి బ్లాక్ బస్టర్ చూశాక బాధ అనిపించలేదా? అని అడిగితే… “అఫ్ కోర్స్, అఫ్ కోర్స్” అని ఒప్పుకున్నారు మనోజ్. ఆ సినిమాలు చూసినప్పుడు చాలా సార్లు రిగ్రెట్ అయ్యానని చెప్పారు. ముఖ్యంగా అర్జున్ రెడ్డి మిస్ అవ్వడం వల్ల తన కెరీర్ బహుశా డబుల్ అయ్యేదేమో అని కూడా అనిపించిందని మనసులోని మాట బయటపెట్టారు. ఆ సినిమా డైరెక్టర్ సందీప్ రెడ్డి వంగ తో తాను ట్రావెల్ చేశానని కూడా గుర్తుచేసుకున్నారు. రచ్చ సినిమా మిస్ అయినందుకు కూడా బాధపడ్డారని చెప్పారు.
అయితే, మనోజ్ కున్న ఒక స్ట్రాంగ్ ఫిలాసఫీ ఏంటంటే… “ఒకటి పోతే ఇంకోటి వస్తుందండి”. ఈ విషయాన్ని గట్టిగా నమ్ముతానని, కచ్చితంగా మంచివి ఇంకొన్ని తొందర్లో వస్తాయని ఆశిస్తున్నానని అన్నారు.
మొత్తానికి, మంచు మనోజ్ కెరీర్ లో ఇలా కొన్ని మంచి అవకాశాలు మిస్ అయ్యాయని మనకు ఇప్పుడు తెలిసింది. అయినా సరే, ఆయన కొత్త ఉత్సాహంతో, భైరవం సినిమాతో మళ్ళీ ప్రేక్షకుల ముందుకు వస్తున్నారు. మనోజ్ అన్నట్టుగా, ఒకటి పోతే ఇంకోటి వస్తుంది కాబట్టి… ఫ్యూచర్ లో మనోజ్ చేయబోయే సినిమాలు తప్పకుండా పెద్ద హిట్లు అవ్వాలని మనమూ కోరుకుందాం!
